我對廣東音樂和粵劇粵曲並無專業認識。《走馬》一曲的深刻印象是來自1980年粵劇名家紅線女率領廣東粵劇院訪港，舉辦「省港紅伶大會串」。經典劇目之一是她與梁醒波合演的《刁蠻公主戇駙馬》，此劇內容多處以廣東音樂名曲如《雙飛蝴蝶》、《春風得意》、《平湖秋月》等等配上曲詞演繹而成。其中兩處令我至今印象難忘：其一是駙馬被公主趕出房門捱更抵夜食風受冷，曲詞主旋律來自《鳥驚喧》一曲，我早前已用琵琶「樂」彈奏。其二就是駙馬對嫁入其家門的刁蠻公主施以下馬威命其下跪，曲詞主旋律來自《走馬》一曲。以下是演出截圖及演唱之曲詞：
梁：一於快啲跪下先啦。
紅：我跪來跪去怕乜嘢跪啫，我當跪我祖先啫。
梁：你要低頭屈膝快啲，不准你多言！要跪正我跟前，若果不從，不從吾命我就難為你方便！
紅：你要奴奴跪你呀，你罪大難倖免嘞。你要奴奴跪你呀，你折墮我唔願見咯。
梁：你入得我門來，跪吓，禮所當然。
紅：點解要跪咁耐？
梁：跪個骨添啦！
紅：我跪你你好心甜呀？叫宮人，宮人傳令，傳令返金殿。
梁：（咪行！）你莫過咁派然！你聽我嘅命令，都猶念吓夫妻情面，否則金鐧無呀情，在呀在眼前！
現以琵琶「健」試彈此曲。指甲：尼龍指甲。
Han Fang Pipa Valley 